Fredag 25. september 2020 vert ståande som ein merkedag i Sandane golfklubb si historie. Etter fleire tusen dugnadstimar kunne styret endeleg ønskje velkomen til offisiell opning av klubbhuset.
Oddbjørn Vee ønskte dei frammøtte velkomen, før han på karakteristisk vis minna om at spritflaskene som var plassert rundt omkring var til utvortes bruk. Grunna smittevern måtte ein avgrense kor mange som kunne kome på opninga, så det var berre sponsorar og andre samarbeidspartnerar som fikk invitasjon.
Oddbjørn Vee slapp deretter til Harald Buene, som har vore leiar i golfklubben i over 16 år. Buene nytta anledninga til å takke alle som på ulike vis har bidrege for å gjere dette fantastiske klubbhuset til ein realitet. Han fortalte deretter litt om vegen frå idé til realisering.
Alle i styret fikk velfortent skryt, men Buene trakk spesielt fram Tore Støylen, Kjell Jacobsen og baneeigar Didrik Eide. Desse har til saman tre tusen dugnadstimar!
Kultursjef i Gloppen kommune Liv Jorun Andenes, gratulerte på vegner av kommunen med dette fantastiske anlegget.
Seniorrådgjevar i Vestland fylkeskommune Atle Skrede fikk æra av å klippe snora. I talen trakk han spesielt fram glopparane si dugnadsånd, som han meinte måtte vere heilt på topp på landsbasis.
Etter opninga fikk dei frammøtte omvising i og rundt klubbhuset, som mellom anna har golfsimulator og selskapslokale med utsikt mot Eidsfossen, Gloppenelva og Ryssdalshornet. Desse selskapslokala var allereie forrige helg booka til konfirmasjon.
Takk til alle som har lagt ned ein fenomenal innsats for å gjere klubbhuset til ein realitet! Vi ønskjer samtidig alle velkomen innom vårt flotte klubbhus!